მსოფლიო ჩემპიონატი 2010 |

ვუვუზელას გამო (თითო შეკითხვა მსოფლიო ჩემპიონატის თითო დღისათვის)

22.06.2010 | 894 | blogsnetgazeti
ვუვუზელას გამო (თითო შეკითხვა მსოფლიო ჩემპიონატის თითო დღისათვის)


მივყვეთ არათანმიმდევრულად:

•    თამაშის დროს ფეხბურთელები თუ არჩევენ, რომელი გუნდის გულშემატკივრები უბერავენ ვუვუზელას?

•    თუ ვერ არჩევენ – შეუძლია თითოეულ გუნდს, თავისი ქომაგების ხმიანობად მიითვალოს ვუვუზელას ზმუილნარევი ჭყვიტინი?

•    აღიქვამენ გუნდები ვუვუზელას ხმას გულშემატკივრობად, ამხნევებს ის მათ თუ ცოტათი მაინც უშლის ნერვებს?

•    ნეტავ, მწვრთნელებზე როგორ მოქმედებს ვუვუზელა?

•    რატომ არ იღლებიან ისინი, ვინც ვუვუზელას უბერავს?

•    ტრიბუნებზე აწუხებთ ვუვუზელას ხმა თუ ყურები დახშული აქვთ, რათა მხოლოდ უბერონ?

•    რა დრო მიუდით თამაშის ყურებაში იმათ, ვინც განუწყვეტლად ვუვუზელას უბერავს?

•    რა სიამოვნებას იღებენ თამაშით, თუ ძალისხმევის ნაწილს ვუვუზელას ახმიანებას ახარჯავენ?

•    ამ ხალხს ფეხბურთის უფრო მეტი გაეგება თუ ვუვუზელასი?

•    სტადიონზე მისული სხვადასხვა გუნდის ფანები თუ ეჯიბრებიან ერთმანეთს, ვინ უფრო მაგრა ჩაბერავს ვუვუზელას?

•    ჩემპიონატის შემდეგ სად შეიძლება გამოიყენონ ვუვუზელაში ჩაბერვის გამოცდილება?

•    ვუვუზელას მსმენელს, ერთხელ მაინც გიფიქრიათ, რომ ტელევიზორთან ჯდომა სჯობს სტადიონზე ყოფნას?

•    რატომ აქამდე ყელში არ ამოუვიდათ ვუვუზელას ხმა?

•    შეიძლება თუ არა ვუვუზელას აკრძალვა?

•    მიგაჩნიათ, რომ ცოტათი მაინც დეგენერატია ის, ვისაც ვუვუზელა აქვს თამაში დროს პირში გარჭობილი და ისე სუნთქავს?

•    რამ უფრო დაუკარგა გასამხნევებელი სიმღერის ხალისი ინგლისის ნაკრების ფანებს – ვუვუზელას ჭყვიტინმა თუ მათი გუნდის თამაშმა?

•    რომელ ნაკრებს ჰკიდია ბოლომდე ვუვუზელას ხმა?

•    ამიერიდან სხვა კონტინენტებზეც ჩაბერავენ ფეხბურთის დროს ვუვუზელას?

•    სპორტის სხვა სახეობათა გულშემატკივრობისას მოიხმარენ თუ არა ვუვუზელას ამ ჩემპიონატის შემდგომ?

•    რას შეადარებდით ვუვუზელას ბგერას?

•    საქართველოში გაგიტყდებათ თუ არა, თამაშის დროს ჩაბეროთ ვუვუზელას?

•    რას ეტყოდით იმას, ვინც სტადიონზე თქვენს გვედრით ან უკან ზის და ვუვუზელას უბერავს მაშინ, როცა ყურები დამცავი სუბსტანციით არ გაქვთ ამოგლესილი?

•    ვუვუზელას გაუთავებელი ხმიანობა და თანმხლები ცუნდრუკი არის თუ არა დამატებითი არგუმენტი ევოლუციის თეორიის სასარგებლოდ?

•    რატომ აიტაცეს სამხრეთ აფრიკაში ჩასულმა ფანებმა ვუვუზელა და მიბაძეს მასპინძლებს?

•    რა არის ვუვუზელას არსებითი თავისებურება?

•    რომელი ინსტრუმენტი მიგაჩნიათ ვუვუზელაზე უარესად?

•    არის თუ არა მომენტები მატჩის მსვლელობისას, როცა ვუვუზელაზე უფრო მონოტონურად რაიმე სხვა ბგერა გეჩვენებათ? თუ კი – რომელი?

•    ამ ჩემპიონატზე რა ქმნის ვუვუზელაზე უფრო მკვეთრ შთაბეჭდილებას?

•    მაქსიმალური ფასი, რასაც გადაიხდით ვუვუზელას შესაძენად?

•    რა ფერის ვუვუზელა გირჩევნიათ?

•    როგორ იმოქმედა ვუვუზელამ კონკრეტულად სამხრეთ აფრიკელთა და, ზოგადად, ადამიანთა შესახებ თქვენს წარმოდგენაზე?

აქ მოვრჩეთ. თორემ ეს ტექსტიც ვუვუზელას ემგვანება, ვატყობ.